மலேசியாவில் முரசு என்று எந்தத் திசையில் இருந்து சொன்னாலும் ஒருவரையே குறிக்கும்.
அவர்தாம் பாப்பாவின் பாவலர் என்று தமிழ் நல்லுள்ளங்களால் பாராட்டப்பெறும் கவிஞர், தமிழறிஞர், முனைவர் திரு முரசு நெடுமாறன் அவர்கள்.
கேரித்தீவில் பிறந்து வளர்ந்து தமிழ்ப்பள்ளி ஆசிரியராய்த் தொடங்கி மலேசியப் புத்ரா பல்கலைக்கழக பகுதி நேரத் தமிழ் விரிவுரையாளராகவும் சென்னை உலகத் தமிழ் ஆராய்ச்சி நிறுவனத்தில் வருகைதரு பேராசிரியராகவும்
பணியாற்றியவர் முனைவர் முரசு நெடுமாறன் அவர்கள்.
கடந்த தைத்திங்கள் முதல் நாளில் 75வது அகவை நிறைவு கண்ட முனைவர் தம் வாழ்வில் தமிழோடு, தமிழரோடு நடந்தவர். சுயமரியாதைக் கொள்கையோடு பகுத்தறி வாழ்க்கையைப் பின்பற்றிய கொள்கையாளர்.
தமிழர் நலன், தமிழ் வளர்ச்சி, இலக்கிய ஆய்வுகள், கவிதைகள், இலக்கிய நாடகங்கள், குழந்தை இலக்கியம், மாணவர் கல்வி என்று இவரது தொண்டுகள் பல துறைகளில் கிளை பரப்பின.
அவர் படைப்புகளில் தலை நிமிர்ந்து நிற்கும் நூற்கள் மலேசிய சிங்கப்பூர் தமிழர்களின் அடையாளத்தை நமக்கு மீட்டுத்தரும் 'மலேசியத் தமிழ்க் கவிதைக் களஞ்சியம்', 'மலேசியத் தமிழரும் தமிழும்' என்ற இரு நூற்கள்.
எளிய குடும்பத்தில் பிறந்து எளிய வாழ்வே வாழ்ந்து கல்வி, கலை, இலக்கியத்திறன்களை முயன்று வளர்த்து அவற்றின் வளங்களை சமுதாயத்திற்கே திரும்பவும் படைத்தளித்து ஆலமரம்போல் உயர்ந்து படர்ந்து தமிழுக்குப் பயனுள்ள ஒருவராய் தன்னடக்கத்தோடு வாழ்ந்து வரும் முனைவர் முரசு நெடுமாறன் அவர்களின் தமிழ்க்கொடைகளைப் பாராட்டி நன்றி கூறும் வகையில் 'முரசோவியம்' எனும் விழாவை அவரது மாணவர்களும் நண்பர்களும் சமுதாயப் பெருமக்களும் அவரது குடும்ப உறவுகளும் முன்னின்று நடத்தவிருக்கின்றனர்.
இந்த விழாவில் கலந்து கொள்க களிப்பு கொள்க என்று உங்களை அன்புடன் அழைக்கிறோம்.
|
